ରାଉରକେଲା ସହରରେ ଶାନ୍ତିଶୃଙ୍ଖଳାର ସହିତ ପାଳିତ ହେଲା ପବିତ୍ର ‘ମହରମ୍’
1 min read
ମହରମ୍ର ଅର୍ଥ ହେଉଛି ‘ଶୋକ କାଳ’। ଏହା ଇସ୍ଲାମିକ୍ କ୍ୟାଲେଣ୍ଡରର ପ୍ରଥମ ମାସ, ଯାହା ପାଶ୍ଚାତ୍ୟ ଦ୍ୱାରା ଗ୍ରହଣ କରାଯାଇଥିବା ଗ୍ରେଗୋରିଆନ୍ କ୍ୟାଲେଣ୍ଡର ଠାରୁ ଦଶରୁ ବାର ଦିନ କମ୍ ଅଟେ। ଏହା ସମଗ୍ର ବିଶ୍ୱରେ ମୁସଲମାନମାନଙ୍କ ପାଇଁ ଗୁରୁତ୍ୱପୂର୍ଣ୍ଣ ଧାର୍ମିକ ମହତ୍ତ୍ୱ ରଖେ। ଏହା ମହମ୍ମଦଙ୍କ ନାତି ଇମାମ ହୁସେନ୍ ଏବଂ କରବାଲା ଯୁଦ୍ଧରେ ତାଙ୍କ ଅନୁଗାମୀମାନଙ୍କ ମୃତ୍ୟୁକୁ ସ୍ମରଣ କରାଇଥାଏ। ମହରମ ସମୟରେ ମୁସଲମାନମାନେ ଶୋକ ସମାରୋହ, ଶୋଭାଯାତ୍ରା ଏବଂ ଇମାମ ହୁସେନ୍ ଏବଂ ତାଙ୍କ ସାଥୀଙ୍କ ଦ୍ୱାରା କରାଯାଇଥିବା ବଳିଦାନକୁ ସ୍ମରଣ କରି ଏବଂ ସମ୍ମାନ ଦେବା ପାଇଁ ଶୋକ ସଂଗୀତ ଗାନ କରନ୍ତି।
ଅନ୍ୟାୟ ବିରୋଧରେ ବଳିଦାନ, ସାହସିକତା ଏବଂ ଦୃଢତାକୁ ସ୍ମରଣ କରିବାର ଦିନ ହେଉଛି ମହରମ। ମୁସଲମାନମାନେ ଇମାମ ହୁସେନ୍ଙ୍କ ଦୁଃଖ ସହ ନିଜର ଦୁଃଖ ଏବଂ ଏକତାକୁ ପ୍ରକାଶ କରିବା ନେଇ ଶୋଭାଯାତ୍ରା ସହ ଶୋକ ସଂଗୀତ ଗାନ କରନ୍ତି ଏବଂ ସମବେଦନା ସଭାରେ ଅଂଶଗ୍ରହଣ କରନ୍ତି ମୁସଲମାନମାନେ। ଏହି କ୍ରମରେ ରାଉରକେଲା କେନ୍ଦ୍ରୀୟ ମହରମ୍ ପାଳନ କମିଟି ସମେତ ମହତାବ ରୋଡ୍, ମଉଲା ଅଲ୍ଲି ଲେନ୍ ଏବଂ ମାଲଗୋଦାମ ଅଞ୍ଚଲର ମହରମ କମିଟି ପକ୍ଷରୁ ଶୋଭାଯାତ୍ରା ବାହାରିଥିଲା।
ଏହି ଶୋଭାଯାତ୍ରାରେ ବିଭିନ୍ନ ବର୍ଗର ହଜାର ହଜାର ରାଉରକେଲାବାସୀ ଭାଗନେଇଥିଲେ। ଶ୍ରଦ୍ଧା, ବଳିଦାନ ଓ ତ୍ୟାଗର ପ୍ରତୀକଭାବେ ପାଳନ ହେଉଥିବା ମହରମ୍ ପର୍ବ ଉପଲକ୍ଷେ କ୍ଷୁଦ୍ର ଭାରତର ସହର ରାଉରକେଲାରେ ଏହି ପର୍ବ ଶାନ୍ତିଶୃଙ୍ଖଳାର ସହିତ ପାଳିତ ହୋଇଛି। ଏହି ଅବସରରେ ଆୟୋଜିତ କାର୍ଯ୍ୟକ୍ରମକୁ ମହରମ୍ ଉତ୍ସବ ଆୟୋଜନ ସମିତିର ସଦସ୍ୟମାନଙ୍କ ସମେତ ସ୍ଥାନୀୟ ପ୍ରଶାସନ ଓ ପୋଲିସ କର୍ମୀ ଏବଂ ଅଧିକାରୀମାନେ ସଞ୍ଚାଳନ କରିଥିଲେ। ଶାନ୍ତିଶୃଙ୍ଖଳା ବଜାତ ରଖିବା ନିମନ୍ତେ ୧୪ ପ୍ଲାଟୁନ ପୋଲିସ କର୍ମୀଙ୍କ ସମେତ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
