‘ସାହିତ୍ୟ ହେଉଛି ଉତ୍ତର ନଥିବା ପ୍ରଶ୍ନ’ : ନିର୍ମଳ ମୁଣ୍ଡା ବୌଦ୍ଧିକ ବକ୍ତୃତା ଶୃଙ୍ଖଳାର ଚତୁର୍ଥ ଅର୍ଘ୍ୟ

ସରକାରୀ ସ୍ବୟଂଶାସିତ ମହାବିଦ୍ୟାଳୟ, ରାଉରକେଲା ପକ୍ଷରୁ ଚାଲିଥିବା ‘ନିର୍ମଳ ମୁଣ୍ଡା ବୌଦ୍ଧିକ ବକ୍ତୃତା ଶୃଙ୍ଖଳା’ର ଚତୁର୍ଥ ଅର୍ଘ୍ୟ କାର୍ଯ୍ୟକ୍ରମରେ ‘ଅଶୀ ପରବର୍ତ୍ତୀ ଓଡ଼ିଆ ଗଳ୍ପ ସାହିତ୍ୟ’ ଶୀର୍ଷକ ଅଭିଭାଷଣ କାର୍ଯ୍ୟକ୍ରମ ଆୟୋଜିତ ହୋଇଛି । ସ୍ନାତକୋତ୍ତର ଓଡ଼ିଆ ଭାଷା ଓ ସାହିତ୍ୟ ବିଭାଗ ପକ୍ଷରୁ ବିଭାଗୀୟ ଅଧ୍ୟାପିକା ରଜନୀ କିସାନଙ୍କ ସଂଯୋଜନାରେ ହୋଇଥିବା ଏହି କାର୍ଯ୍ୟକ୍ରମରେ ମହାବିଦ୍ୟାଳୟର ଅଧ୍ୟକ୍ଷ ପ୍ରଫେସର ଡ. ବିଜୟ କୁମାର ବେହେରା ଅଧ୍ୟକ୍ଷତା କରିଥିଲେ । ବରିଷ୍ଠ ସାହିତ୍ୟିକ ତଥା କେନ୍ଦ୍ର ସାହିତ୍ୟ ଏକାଡେମୀର ସଦସ୍ୟ ଡ. ଗୌରହରି ଦାସ ଏଥିରେ ସ୍ବତନ୍ତ୍ର ଅତିଥିଭାବେ ଯୋଗଦେଇ ଶୀର୍ଷକ ବିଷୟ ସମ୍ପର୍କରେ ଆଲୋଚନା କରିଥିଲେ । ସାମ୍ପ୍ରତିକ ସମୟରେ ସାହିତ୍ୟର ଧାରା ଓ ଦିଗ ପରିବର୍ତ୍ତନଶୀଳ ଥିଲାବେଲେ ସାହିତ୍ୟ କାହାପାଇଁ ତାହା ଆଲୋଚନାର ବିଷୟ ବୋଲି ପ୍ରଫେସର ଡ. ବେହେରା କହିଥିଲେ ।

ଡ. ଦାସ ‘ସବୁ ମଣିଷ ସବା ଶେଷରେ ଗପ ହୋଇଯାଇଥାଏ’ ବୋଲି କହିବା ସହ ତାଙ୍କ ବକ୍ତବ୍ୟ ଆରମ୍ଭ କରିଥିଲେ । ଗଳ୍ପ ପଢ଼ିବା ସମୟରେ ତାହା ସତଭଳି ଲାଗୁଥିଲେ ହିଁ ତାହା ଗଳ୍ପକୁ ସାର୍ଥକ କରିଥାଏ । ୧୮୯୮ ମସିହାର ରେବତୀ ଗଳ୍ପରୁ ଆରମ୍ଭ ହୋଇଥିବା ୧୨୫ବର୍ଷର ଓଡ଼ିଆ ଗଳ୍ପ ସାହିତ୍ୟର କ୍ରମବିକାଶ ପ୍ରସଙ୍ଗରେ ଡ. ଦାସ ବିଭିନ୍ନ ଉଦାହରଣ ମାଧ୍ୟମରେ ଆଲୋଚନା କରିଥିଲେ। ସାହିତ୍ୟ ହେଉଛି ମଣିଷର ସମାନ୍ତରାଳ ଇତିହାସ । ମଣିଷର ହୃଦୟ ମଧ୍ୟରେ ଆବେଗକୁ ନିୟନ୍ତ୍ରଣ କରିବାରେ ସାହିତ୍ୟର ଭୂମିକା ଗୁରୁତ୍ବପୂର୍ଣ୍ଣ । ସାହିତ୍ୟ ହେଉଛି ଉତ୍ତର ନଥିବା ଗୋଟିଏ ପ୍ରଶ୍ନ । ଅଶୀଦଶକର ପରବର୍ତ୍ତୀ ଓଡ଼ିଆ ଗଳ୍ପ ସାହିତ୍ୟରେ ମଣିଷର ଦୁଃଖ, ଦୁର୍ଦ୍ଦଶା, ସୁଖ, ପ୍ରେମ, ସମସ୍ୟା ଓ ସାମ୍ଭାବ୍ୟ ସମାଧାନ ପ୍ରମୁଖ ପ୍ରସଙ୍ଗ ସହିତ ବାମାବାଦ ବା ନାରୀବାଦକୁ ଗୁରୁତ୍ବ ଦିଆଯାଇଛି ବୋଲି ଡ. ଦାସ କହିଥିଲେ । ସାହିତ୍ୟ ହେଉଛି ସବୁ ଭଲକାଳର ସମ୍ବାଦ ।

ଅଶୀ ପରର ଓଡ଼ିଆ ଗଳ୍ପ ସମ୍ପର୍କରେ ଡ ଦାସ ବିଭିନ୍ନ ଆଲୋଚନା କରିବା ସହ ଅଭିଜ୍ଞତା ନିଆଁରେ ଆଙ୍ଗୁଳି ନପୋଡ଼ିଲେ ଏବଂ ବାସ୍ତବ ଅନୁଭୂତି ନ ହେଲେ ଗଳ୍ପ ଲେଖିବା ଅସମ୍ଭବ ବୋଲି କହିଥିଲେ। ବିଭାଗୀୟ ମୁଖ୍ୟ ଡ. ସୁଷମା ମୋଦୀ ଏଭଳି ବକ୍ତୃତା ଆୟୋଜନ ଛାତ୍ରଛାତ୍ରୀମାନଙ୍କର ବିଭିନ୍ନ ବିଷୟ ସମ୍ପର୍କୀତ ଜ୍ଞାନର ସୀମାକୁ ବ୍ୟାପକ କରାଯିବାର ଏକ ଅନନ୍ୟ ମାଧ୍ୟମ ବୋଲି କହିଥିଲେ । ବିଭାଗୀୟ ଅଧ୍ୟାପକ ଡ. ପ୍ରଶାନ୍ତ କୁମାର ମହାରଣା ଅତିଥି ପରିଚୟ ପ୍ରଦାନ କରିଥିଲାବେଳେ ଅନ୍ୟତମ ଅଧ୍ୟାପିକା ଡ. ସୁଚିତ୍ରା ମହାନ୍ତି ଧନ୍ୟବାଦ ପ୍ରସ୍ତାବ ଦେଇଥିଲେ । ଏଥିରେ ବିଭିନ୍ନ ବର୍ଗର ଛାତ୍ରଛାତ୍ରୀମାନଙ୍କ ସମେତ ଅଧ୍ୟାପକ ଓ ଅଧ୍ୟାପିକାମାନେ ଯୋଗଦେଇଥିଲେ । ଛାତ୍ରଛାତ୍ରୀମାନେ ଏହି ଅବସରରେ ଡ. ଦାସଙ୍କୁ ସାହିତ୍ୟ ସମ୍ପର୍କୀତ ବିଭିନ୍ନ ପ୍ରଶ୍ନ ପଚାରିବା ସହ ଏହାର ଉତ୍ତର ପାଇଥିଲେ । ବିଭାଗୀୟ ଅଧ୍ୟାପକ ସୁବନାଥ ଶା’ ଙ୍କ ସମେତ କାର୍ଯ୍ୟକ୍ରମ ପରିଚାଳନା କରିବାରେ ବିଭାଗୀୟ ଅଧ୍ୟାପକ ବିଶ୍ବଜିତ ଦାସ ଓ ଦିପ୍ତିମୟୀ ପ୍ରଧାନ ପ୍ରମୁଖ ସହଯୋଗ କରିଥିଲେ । ଏହି ଅବସରରେ ଛାତ୍ରଛାତ୍ରୀମାନଙ୍କ ଦ୍ବାରା ପ୍ରଥମ ଓଡ଼ିଆ ଗଳ୍ପ ‘ରେବତୀ’ ର ୧୨୫ ବର୍ଷ ପୂର୍ତ୍ତି ଉପଲକ୍ଷେ ରେବତୀ ଗଳ୍ପ ଆଧାରରେ ଏକ କ୍ଷୁଦ୍ର ନାଟିକା ପରିବେଷିତ ହୋଇଥିଲା ଏହା ସହିତ ଛାତ୍ରଛାତ୍ରୀଙ୍କ ଦ୍ବାରା ସାଂସ୍କୃତିକ କାର୍ଯ୍ୟକ୍ରମର ଅନ୍ୟତମ ଆକର୍ଷଣ ଥିଲା ।